पञ्चनमा ३९ करोडको खानेपानी योजना

जिल्लाको थुलुङ दुधकोशी गाउँपालिका वडा नम्बर ३ पञ्चनमा रु.३९ करोडको खानेपानी योजना सञ्चालन हुने भएको छ ।

गाउँपालिका अध्यक्ष असिम राईको पहलमा संघीय खानेपानी आयोजना खोटाङ मार्फत उक्त योजना सञ्चालन हुने गाउँपालिका प्रवक्ता भोजराज कार्कीले जानकारी दिए ।

“पञ्चन लिफ्ट वाटर सप्लाई प्रोजेक्ट“ का लागि ३९ करोडको श्रोत सुनिश्चित भएकाले तत्काल कार्य अघि बढाइने आयोजनाले जनाएको छ । आयोजना प्रमुख सुनिल तिवारीका अनुसार पहिलो चरणका लागि १२ करोडसम्मको टेण्डर हुनेछ । दुधकोशीको पानी लिफ्ट प्रविधिबाट पन्चन भञ्ज्याङसम्म ल्याएर वितरण हुने छ । जसबाट वडा नम्बर ३ को करिब ९० प्रतिशत घरधुरीमा पीउने पानी पुग्नेछ ।

आयोजना सञ्चालनका लागि पहिलोचरणमा आयोजना प्रमुख, थुलुङ दुधकोशी गाउँपालिका स्थित खानेपानी व्यवस्थापन बोर्ड, जनप्रतिनिधि र स्थानीय सरोकारवाला बीच छलफल गरिएको छ । यस अघिको डीपीआर पुनरावलोकन गरि डम्बरकेशन गरिने र तत्काल कार्य अघि बढ्ने प्रवक्ता कार्कीले जानकारी दिए ।

तीनवटा स्टेशनमा पानी तान्ने काम सकिएपछि घरघरमा वितरणको कार्य समेत संगै अघि बढाइने योजना रहेको गाउँपालिका अध्यक्ष असिम राईले बताए । जिल्लामै सुख्खा क्षेत्रको रुपमा रहेको पन्चनमा दीगो खानेपानी व्यवस्थापनका लागि निक्कै मेहनतका साथ लिफ्टिङ योजना ल्याउन सफल भएको स्मरण गर्दै अध्यक्ष राईले अबको केही वर्षमा पञ्चनको समस्या समाधान हुने विश्वास व्यक्त गरे । यस अघि पनि थुप्रै योजनाहरु सन्चालन भएको भएपनि व्यवस्थित र दीगोरुपमा सञ्चालन हुन नसक्दा लथालिङ्ग हुनका साथै नागरिकको समस्या जस्ताको तस्तै रहेकाले यस प्रति स्थानीय सरकार सचेत रहेको भन्दै अध्यक्ष राईले पञ्चन सहित पालिकाको सबै वडामा खानेपानीको दीगो व्यवस्थापनका लागि खानेपानी व्यवस्थापन बोर्डनै गठन गरि काम गरिरहेको एक मात्र गाउँपालिका थुलुङ दुधकोशी रहेको दाबी गरे ।

आयोजना सञ्चालन हुनेभएपछि स्थानीयबासी हर्षित भएका छन् । कालिका देवि माध्यमिक विद्यालय व्यवस्थापन समिति अध्यक्ष मिन प्रसाद कोइरलाले पञ्चन बासीको खानेपानी सम्बन्धि समस्याको अन्त्यको दिन छोटिदै गएको बताए ।

तत्काल काम हुनेभएपछि हर्षित भएका स्थानीयबासीले उपभोक्ताको तर्फबाट हुने सबै काम गर्न तयार रहेको बताएका छन् । उपभोक्ता समितिका अध्यक्ष प्रवेश राईले गाउँको बिकासका लागि जस्तोसुकै काम गर्न आफुहरु तयार रहने प्रतिवद्धता व्यक्त गरे ।