रविविरुद्ध बहस गर्न तीन जिल्लाबाट खटिए वकिल

राष्ट्रिय स्वतन्त्र पार्टी रास्वपाका सभापति रवि लामिछानेको मुद्दामा बहस गर्न तीन जिल्लाबाट सरकारी वकिल खटाईएको छ ।

चितवनमा पर्याप्त सरकारी वकिल भए पनि पर्सा, बारा र धादिङबाट सरकारी वकिलका प्रमुखहरूलाई लामिछाने बिरुद्द बहस गर्न चितवन पठाइएको छ । चितवनको साहारा चितवन सहकारीको रकम अपचलनमा प्रतिवादी रहेका लामिछाने बुधबार जिल्ला अदालतमा उपस्थित भएका थिए । बुधबार बयान भएकोमा बिहीबारदेखि बहस सुरु भएको छ ।

जसका लागि पर्सा जिल्लाका न्यायाधिवक्ता भोलानाथ निरौला, बाराका जिल्ला न्यायाधिवक्ता शम्भुकुमार बस्नेत र धादिङका दशरथ पंगेनीलाई चितवन अदालतमा खटाइएको छ । चितवनमा लामिछानेविरुद्ध ठगीको मुद्दा मात्र दायर गरिएको छ । उनलाई संगठित अपराध मुद्दा नचलाएको भन्दै जिल्ला न्यायाधिवक्ता शान्तिप्रसाद लुइँटेललाई मंगलबार नै हटाएर रवि न्यौपानेको सरुवा गरिएको थियो । न्यौपानेसहित चितवनबाट समेत चारजना सरकारी वकिलले बहस गर्दै छन् ।

बहस सकिए आजै थुनछेक आदेश आउनेछ।