निजी विद्यालय सरकारीकरणको आवश्यक छैनः मुख्य मन्त्री कार्की

कोशी प्रदेशका मुख्यमन्त्री हिक्मतकुमार कार्कीले निजी विद्यालयहरु सरकारले बनाएको नियम भित्र रहेर सञ्चालन भइरहेको भन्दै सरकारीकरण गर्नु आवश्यक नरहेको बताएका छन् ।

राज्यले निजी विद्यालय सरकारिकरण गर्न अहिले नै सक्ने अवस्था समेत नरहेको जिकिर गरे । सरकारीकरण गर्ने कानुन ल्याए राज्य नै असफल हुने अवस्था आउने उनको भनाई थियो । मुख्यमन्त्री कार्कीले सामुदायिक विद्यालयको अवस्था हेर्दा राज्यले काम गर्न नसकिरहेको अवस्था देखिएको भन्दै पहिले सामुदायिक विद्यालयको अवस्था सुधार गर्न सरकार लाग्नु पर्ने बताए । निजी तथा आवासीय विद्यालय अर्गनाइजेसन नेपाल (प्याब्सन) को कोशी प्रदेश अधिवेशनको उद्घाटनका क्रममा मुख्य मन्त्री कार्कीले निजी क्षेत्र शिक्षाबाट बाहिर हट्न खोजे समस्या आउने बताए ।

मुलुकको आर्थिक सम्वृद्धिको अघि बढ्न निजी क्षेत्रसँग सहकार्य गरेर अघि बढ्नुको विकल्प नभएको बताउँदै उनले संविधान र कानुनको परिधिभित्र रहेर काम गरे प्रदेश सरकार सहयोगका लागि तयार रहेको बताए ।

कार्यक्रममा बोल्दै प्याब्सनका पुर्वअध्यक्ष टिकाराम पुरीले सरकारले जनसङ्ख्या वृद्धि सम्बन्धी नीति ल्याउनु पर्ने माग गरे । युवा जनशक्ति विदेश पलायन भएसँगै जन्मदर समेत कम भएको भन्दै पुरीले जनसङ्ख्या वृद्धि नीति ल्याउनु पर्ने औल्याए ।