सोलुखुम्बुमा एचपीभी खोप माघ २२ गतेबाट

सोलुखुम्बु जिल्लामा पाठेघरको मुखको क्यान्सरविरूद्धको एचपीभी खोप अभियान माघ २२ गतेबाट शुरु हुने भएको छ । प्रारम्भिक चरणमा सम्बन्धित स्थानमा खोप पुर्याउने तथा स्वास्थ्यकर्मीलाई प्रशिक्षण लगायतको तयारी अन्तिम चरणमा रहेको जिल्ला स्वास्थ्य कार्यालय, सोलुखुम्बुले जनाएको छ ।

आउँदो मङ्गलवार माघ २२ देखि फागुन ६ गतेसम्म संचालन हुने खोप अभियानमा ६ देखि १० कक्षासम्मका छात्रा तथा विद्यालय नजाने १० देखि १४ वर्ष उमेर समूहका किशोरीलाई एचपीभी खोप लगाउन लागिएको स्वास्थ्य कार्यालयका प्रमुख सुमन तिवारीले जानकारी दिए । उनले खोप सुरक्षित भएकाले ढुक्कसँग लगाउन आग्रह गरेका छन् । किशोरावस्थामै खोप दिन सकेमा पाठेघरको मुखको क्यान्सरबाट धेरै महिलालाई जोगाउन सकिने उल्लेख गरिएको छ ।

सोलुुखुम्बुमा यस पटक ५ हजार भन्दा बढि किशोरीलाई यो खोप लगाउने उद्धेश्य रहेको कार्यालयले जनाएको छ । एचपीभी खोपको मात्रा एक डोज लगाए जीवनभर पुग्ने र पाठेघरको मुखको क्यान्सरको जोखिम धेरै कम हुने भएकाले खोप अभियानमा सहभागी हुन सरकारले आग्रह गरिरहेको छ ।