प्रचण्डले गर्दा काङ्ग्रेस एमाले मिलेको उपाध्यक्ष ज्ञवालीको दाबी

नेकपा एमालेका उपाध्यक्ष युवराज ज्ञवालीले माओवादी अध्यक्ष पुष्पकमल दाहाल प्रचण्डले एमाले र कांग्रेसलाई मिलाइदिएको बताएका छन्।

नेकपा एमाले रामेछापले आयोजना गरेको जिल्ला स्तरीय प्रशिक्षण कार्यक्रमको शुक्रबार उद्घाटन गर्दै ज्ञवालीले प्रचण्डको अवसरवादी चरित्रको कारण कांग्रेस र एमाले एक ठाउँमा उभिने वातावरण बनेको बताएका हुन् । प्रचण्डको धोका र अस्थिरतामा खेल्ने प्रवृत्तिबाट दिक्क भएका कांग्रेस सभापति शेरबहादुर देउवाले एमालेलाई सरकारको नेतृत्व लिन आग्रह गरेको उनले सुनाए ।

राष्ट्रिय दल समेत बन्ने नसकेर जम्मा १० सिट ल्याएका माधव नेपाल समेत प्रधानमन्त्री हुने लाइनमा बसेपछि स्थिर सरकार बनाउन एमाले सरकारमा जानु पर्ने स्थिति आएको बताउदै ज्ञवालीले अहिले एमाले र कांग्रेसको संयुक्त सरकार भए पनि कांग्रेसलाई हेर्ने एमालेको प्रष्ट दृष्टिकोण भएको स्पष्ट पारे।