हवाई दुर्घटनामा १८ वटा शव भेटियो

संयुक्त राज्य अमेरिकाको वाशिङ्टन डिसीस्थित विमानस्थलमा भएको दुर्घटनामा परेका मध्ये कम्तीमा १८ वटा शव नदीबाट निकालिएको छ ।

अवतरण गर्न लागेको एउटा यात्रुवाहक विमान हावामा अमेरिकी सेनाको ब्ल्याक हक हेलिकप्टरसँग ठोकिएर पोटोम्याक नदीमा खसेको थियो ।

घटनास्थलमा रहेका एकजना प्रहरी अधिकारीले कम्तीमा पनि १८ वटा शव नदीबाट निकालिएको बताएका छन्। गोताखोर र उद्धारकर्मीहरू सवार डुङ्गाहरूले न्यून विन्दूमा पुगेको तापक्रमका माझ उक्त नदीमा खोज तथा उद्धार कार्य गरिरहेका छन्।

क्यानसस राज्यबाट उडेको उक्त विमान अमेरिकी राजधानीको मध्यमा अवस्थित रेगन न्याश्नल विमानस्थलमा अवतरण गर्न लागेको थियो। विमानमा चालकदलका सदस्यसहित ६४ जना सवार थिए भने हेलिकप्टरमा तीनजना सैनिक रहेको बताइएको छ। सेनाको हेलिकप्टर प्रशिक्षण उडानमा रहेको बताइएको छ।

अमेरिकी राष्ट्रपति ट्रम्पले आफूले परिस्थितिको निगरानी गरिरहेको बताउँदै आपतकालीन उद्धारकर्मीहरूलाई तिनीहरूको कामका लागि धन्यवाद दिएको बिबिसीले जनाएको छ।