बजेट अभावमा कारागार निर्माणको काम रोकियो

जिल्ला कारागार सोलुखुम्बुमा महिला कैदीबन्दीका लागि निर्माणाधिन भवनको निर्माण कार्य रोकिएको छ । भवन निर्माण कार्य बजेट अभावमा स्थगित भएको कारागार प्रशासनले जनाएको छ ।

९९ लाख ७३ हजार रुपैंयामा निर्माण कार्यको जिम्मा लिएको आयुस्का निर्माण सेवा प्रा.लिले अघिल्लो माघमा नै सम्झौता पश्चात काम शुरु गरेको भएपनि भुक्तानी समयमा प्राप्त नभएपछि निर्माण कार्य रोकिएको सघन सहरी भवन तथा निर्माण आयोजना ओखलढुङ्गाका इन्जिनियर सुदिप दहालले जानकारी दिए ।

२०८१ को जेष्ठ महिना सम्म निर्माण कार्य सम्पन्न गर्ने पुर्व निर्धारित समयमा काम सम्पन्न नहुने भएपछि पहिलो पटक असार २५ गते पुनः म्याद थप गरिइको पनि दाहालले बताए । सम्झौता अनुसार ठेकेदार कम्पन्नीले भवन निर्माण, पर्खाल र २ वटा शौचालय निर्माण गरेको छ ।

बाँकी फर्निचर व्यवस्थापन र शौचालयको सेफ्टी ट्यांकी निर्माण लगायतका काम बाकी रहेको छ । भवन निर्माण पुरा गर्नका लागि बजेट व्यवस्थापनका लागि कारागार व्यवस्थापन विभाग र सघन शहरी मन्त्रालयमा पत्र पठाइएको भएपनि बजेट अहिलेसम्म सुनिश्चित नभएको इन्जिनियर दहालले जानकारी दिए । बजेटको व्यवस्थापन हुन साथ काम अगाडी बढाउने कार्यालयले जनाएको छ ।