नेकपा एमालेको केन्द्रीय समिति बैठकमा अध्यक्ष केपी शर्मा ओलीले पेस गरेको राजनीतिक प्रतिवेदनमाथि केन्द्रीय सदस्यहरूले धारणा राख्ने क्रम सुरु भएको छ ।
पहिलो दिनको बैठकमा आइतबार अध्यक्षको प्रतिवेदनमाथि २७ केन्द्रीय सदस्यले आ–आफ्नो धारणा राखेको प्रचार विभाग प्रमुख राजेन्द्र गौतमले जानकारी दिए । यस पटकको बैठकमा सम्पुर्ण केन्द्रीय सदस्यहरूलाई बोल्नका लागिसमय उपलब्ध गराइने व्यवस्था छ ।
तुल्सीलाल स्मृति प्रतिष्ठान, च्यासलमा बसेको बैठकमा यसअघि ओलीको राजनीतिक प्रस्तावबाहेक महासचिव शंकर पोखरेलले संगठनात्मक कामको सक्षिप्त जानकारी गराएका थिए ।
बैठकमा ओलीले देश विशेष परिस्थितिबाट गुज्रिरहेको र देशभक्त तथा प्रगतिशील शक्ति मजबुत बन्दै गएकाले प्रतिक्रियावादीहरू आतङ्कित भएर अस्वस्थ र झुटो प्रचारको हमलामा उत्रिइरहेको दाबी गरे ।
यस्तै अध्यक्ष ओलीले पार्टीका नेताहरूमा विपक्षीका आरोप र विरोधको खण्डन गर्नुहुँदैन भन्ने धारणा विकास भएको र पार्टी जनजनमा पुग्नुपर्छ भन्ने मान्यतामा पनि कमी आएको भन्दै केन्द्रीय कमिटीका सदस्यहरूको गम्भीर ध्यानाकर्षण गराएको गौतमले बताए ।
ओलीले भने, ‘हामी विरोधीका आरोपमाथि चुप लागेर बस्नु हुँदैन । चुप लागेर बस्नुपर्छ भन्ने कमजोर धारणा हो । विरोधीका आरोपबारे तथ्यका आधारमा खण्डन गर्नुपर्छ । हाम्रा सबै सङ्गठनहरू उत्साहित भएर व्यक्ति व्यक्ति र घर घरमा पुग्नुपर्छ । वैचारिक कामलाई उत्तिकै महत्त्व दिनुपर्छ ।’
अध्यक्ष ओलीले केन्द्रीय कमिटीका सदस्यहरूलाई संगठनात्मक काममा सक्रियतासाथ लाग्न निर्देशन समेत दिएको उनको भनाइ छ ।
यस्तै आजको बैठकले समसामयिक प्रस्ताव तयार गर्न स्थायी कमिटी सदस्यहरू रघुजी पन्त, खगराज अधिकारी र राजेन्द्र गौतम रहेको प्रस्ताव मस्यौदा कमिटी र पोलिटब्युरो सदस्य सूर्य थापा, केन्द्रीय कमिटी सदस्यहरू निरज आचार्य र विष्णु रिजाल रहेको बहस नोट कमिटी गठन गरेको छ ।
यस्तै आजको बैठकबाट राष्ट्रिय महाधिवेशन प्रतिनिधि परिषद् बैठकयता पोलिटब्युरो र केन्द्रीय सचिवालय बैठकबाट भएका निर्णयहरू सर्वसम्मतिले अनुमोदन गरिएको गौतमले बताए ।
प्रतिक्रिया