सगरमाथा जोड्ने सडकको प्रधानमन्त्री ओलीले उद्घाटन गर्दै (फोटो सहित)

प्रधानमन्त्री केपी शर्मा ओली आज सोलुखुम्बुको खुम्बु पासाङल्हामू गाउँपालिका जाने भएका छन् ।

विश्वको सर्वोच्च शिखर सगरमाथा अवस्थित गाउँपालिकासम्म सिधा सडक सम्पर्क स्थापना भएपछि सो सडक उद्घाटनका लागि उनि त्यस तर्फ जान लागेका हुन् । निक्कै विकट क्षेत्र हुँदै २ बर्ष बढीको प्रयास पश्चात खुम्बु क्षेत्र जोड्ने सडकको ट्रयाक ओपन कार्य यसै महिनामात्र पुरा भएको गाउँपालिकाले जनाएको छ ।

खुम्बु पासाङल्हामू गाउँपालिकाको वडा नं. २ मा पर्ने सुर्केसम्म अब सडकको सिधा पहँुच पुगेकोमा गाउँपालिकाबासी एवं पर्यटन सम्बन्धित व्यक्तिहरु खुशी भएका छन् । हालसम्म खुम्बु क्षेत्र पुग्न हवाई जहाज मार्फत लुक्ला ओर्लनु पर्ने वा हिडेर मात्र पुग्न सकिने बाध्यता हटाउन सफल भएको गाउँपालिका अध्यक्ष मिङमा शेर्पाले बताए । सोलुदुधकुण्ड नगरपालिका, माप्यदुधकोशी गाउँपालिका हुँदै खुम्बु क्षेत्र पुगेको सडकको ट्रयाक ओपनका क्रममा खुम्बु पासाङल्हामू गाउँपालिका वडा नं. १ खरिखोला देखि सुर्केसम्मको करिब २५ किलोमिटरमा १६ करोड बढी लागत लागेको पालिकाले जनाएको छ ।

संघिय तथा प्रदेशबाट बार्षिक रुपमा बिनियोजित बजेटको सहयोगमा सडकको ट्रयाक ओपन गर्न सफल भएको कोशी प्रदेशका सांसद एवं पुर्व मन्त्री बुद्धिकुमार राजभण्डारीले बताए । उनले सो सडक खोल्न प्रदेश सरकारको स्थापना भएपश्चात नियमित कार्य भईरहेको तथा हालसम्म ५ करोड बढी बजेट प्रदेश सरकारले प्रदान गरिसकेको समेत जानकारी दिए ।

ङिमदोर्जी शेर्पा पर्यटन सडकको नाम दिईएको सो सडकको ट्रयाक ओपनका क्रममा पालिकाले पनि आन्तरिक बजेट बिनियोजन गरेको पालिका प्रवक्ता ल्हाक्पाछिरी शेर्पाले जानकारी दिए । शेर्पाका अनुसार खरिखोलाबाट थामडाँडासम्म ६ करोड १४ लाख, थामडाँडादेखि सुर्केसम्म १० करोड ५२ लाख लागत लागेको छ ।

सोही सडकको उद्घाटनका लागि प्रधानमन्त्री ओलीका साथमा भौतिक पुर्वाधार तथा यातायात मन्त्री देवेन्द्र दाहाल, रक्षा मन्त्री मानवीर राई, कोशी प्रदेशका मुख्य मन्त्री हिक्मत कार्की लगायतका टोली खुम्बु जाने कार्यक्रम रहेको छ ।