रक्षा मन्त्री मानवीर राईले शिक्षा, विज्ञान तथा प्रविधि मन्त्री विद्या भट्टराईलाई भेटी सोलुखुम्बु लगायत अन्य दुर्गम क्षेत्रको शिक्षाका विकासमा छलफल गरेका छन् ।
बुधबार शिक्षा मन्त्रालयमा छलफलका लागि पुगेका मन्त्री राईले दुर्गम जिल्लाको पनि दुर्गम क्षेत्रको अवस्थामा बारेमा जानकारी गराउँदै समस्याको उजागर गरेको रक्षा मन्त्रीको सचिवालयले जनाएको छ । भेटका क्रममा रक्षा मन्त्री राईले सोलुखुम्बु जिल्लाको दुर्गम क्षेत्रको रुपमा चिनिदै आएको महाकुलुङ्ग गाउँपालिकाको ५ वटा विकट वडा मध्ये पनि वडा नं. ४ र ५ गुदेल क्षेत्रको शिक्षकहरु सेवा सुविधाको हिसावमा मारमा परेका जिकिर गरे ।
यी २ वडा अन्य ३ वटा वडाभन्दा पनि विकट क्षेत्रमा पर्ने भएपनि गुदेलमा कार्यरत शिक्षकले पाउने तलव भत्तामा ख बर्गको सेवा सुविधा लिन बाध्य छन् । अन्य वडा नं. १, २ र ३ मा कार्यरत शिक्षकहरुले भने क बर्गको सेवा लिई रहेकोमा एउटै पालिकाभित्र अझ विकट क्षेत्रको शिक्षकहरुलाई निरुत्साहित हुने गरी सेवा सुविधा उपलब्ध गराईएको भन्दै मन्त्री राईले यस बिषयमा तत्कालै पुर्नबिचार गरी समस्या समाधानका लागि शिक्षा मन्त्री भट्टराईलाई आग्रह गरेका छन् ।
भेटमा सोलुखुम्बुबाट प्रतिनिधि सभामा निर्वाचित भई रक्षा मन्त्री बनेका राईले महाकुलुङ गाउँपालिकाबाट प्राप्त पत्र सहित समस्या समाधानका लागि लिखित सिफारिस सहित छलफल गरेको उनको सचिवालयले जानकारी दिएको छ ।
रक्षा मन्त्री राईले सोलुखुम्बु जस्तै अन्य दुर्गम जिल्लाको पनि हालत यस्तै रहेको बताउँदै यस्ता समस्या भएमा शिक्षकहरुमा उत्साह कम हुने भन्दै शैक्षिक वातावरणमा सुधार ल्याउन प्रथमतः शिक्षकहरुमा पनि उत्साह थप्ने कार्यक्रम ल्याउनु पर्ने बताए ।
दुई मन्त्रीको बीचमा छलफल पश्चात शिक्षा मन्त्री भट्टराईले यसअघिको लागु भएको ऐन तथा कानुन एवं सेवा सुविधा सम्बन्धि भएको कार्यलाई अध्ययन गरी प्रक्रियागत ढंगबाट समस्या समाधान गर्ने प्रतिवद्धता जनाएकी छिन् । सो भेटघाटमा सोलुखुम्बु जिल्लाको अन्य शैक्षिक समस्याहरुको बारेमा समेत छलफल गरिएको थियो ।
प्रतिक्रिया