डा. भीम रावलले कम्युनिस्ट र उदारवादी विचारधारा समेट्ने गरी नयाँ पार्टी गठन गर्ने तयारीमा रहेको बताएका छन् ।
नेकपा एमालेबाट निष्कासनमा परेपछि आक्रोशित र सक्रिय बनेका नेता रावलले आज पत्रकार सम्मेलन आयोजना गरी एमाले अध्यक्ष केपी शर्मा ओली उपर प्रश्नै प्रश्न राखे । अध्यक्ष एवं बर्तमान प्रधानमन्त्री ओली उपर आक्रमक बनेका उनले आफ्नो कुरा भने धेरै राखेनन् ।
दशौं महाधिवेशनमा ओलीसँग अध्यक्ष पदमा प्रतिस्पर्धा गरेकाले आफूलाई पार्टीभित्र किनारीकृत गरिएको उल्लेख गर्दै रावलले ओलीलाई सोधे, ’तपाईंले चाहिँ माधव नेपाल र झलनाथ खनालसँग किन प्रतिस्पर्धा गर्नुभयो ?’
यस्तै उनले दशौं महाधिवेशनमा आफू अध्यक्ष पदका प्रत्याशी बन्दा आफ्नो घोषणापत्रहरू खोसेर च्यात्ने काम गरेको उल्लेख गर्दै सोधे, सौराहामा म बसेको होटल बाहिर रक्सी खुवाएर केही युवाहरू पठाउने अनि मेरा अङ्गरक्षक र सहयोगीलाई बस्ने ठाउँ नै नदिने तपाईं केपी ओली नै होइन र ?’
यस्तै प्रश्नका बिच उनले गत कात्तिक ६ गते आफूलाई महासचिव शंकर पोखरेलले स्पष्टीकरणपत्र पठाएको तर, बिना सम्बोधन पठाएको बताए ।
उनले ओलीले जनतालाई सपना मात्रै देखाउने काम गरेको बताए । रावलले प्रधानमन्त्री हुँदा पनि राति तीन बजे रअ प्रमुख सामन्त गोयलसँग किन भेटेको भनेर ओलीलाई प्रश्न गरे । नयाँ पार्टी गठनका बिषयमा उनले नेपाली काँग्रेस बीपी तथा फरक धारकाहरुसँग एकता गरी वैकल्पिक शक्तिको निर्माण गर्ने बताए ।
प्रतिक्रिया