प्रधानमन्त्री जाली, झेली भएको प्रचण्डको आरोप

नेकपा (माओवादी केन्द्र) का अध्यक्ष पुष्पकमल दाहालले प्रधानमन्त्री केपी शर्मा ओलीमाथि आरोप लगाउँदै उनलाई ‘देशकै सबैभन्दा जाली, झेली, कपटी र बेइमानी व्यक्ति’ भएको टिप्पणी गरेका छन्।

सोमबार झापा-५ स्थित गौरीगञ्ज गाउँपालिका-३ मा आयोजित माओवादी केन्द्रको दोस्रो गाउँ सम्मेलनलाई सम्बोधन गर्दै दाहालले यस्तो टिप्पणी गरेका हुन्।

दाहालले गिरिबन्धु टी स्टेट भ्रष्टाचार प्रकरण र नक्कली भूटानी शरणार्थी प्रकरणको अनुसन्धान थाल्नासाथ आफूलाई प्रधानमन्त्रीबाट ‘तानाशाही र अलोकतान्त्रिक’ तरिकाले हटाइएको आरोप लगाए।

‘मैले गिरिबन्धु टी स्टेटको बदमासीमा केपी ओलीको संलग्नता खोज्न थालेपछि र नक्कली भूटानी शरणार्थी प्रकरणमा बेचन झा पक्राउ परेसँगै सरकार ढालिएको हो,’ उनले भने।

अध्यक्ष दाहालले गिरिबन्धु टी स्टेटमा प्रधानमन्त्री ओलीले गरेको भ्रष्टाचारको पर्दाफास गर्ने दृढता व्यक्त गरे। उनले भने, ‘म गिरिबन्धुको, ओम्नीको, वाइडबडीका तमाम भ्रष्टाचारको अन्त्य गरेरै छोड्नेछु। उहाँको दिमागमा जालझेलबाहेक केही देखिँदैन।’

दाहालले नेपाली जनताले रगत र पसिना बगाएर प्राप्त गरेका उपलब्धि कुनै हालतमा खोस्न नदिने अठोट व्यक्त गरे। उनले संविधान संशोधनको नैतिक अधिकार माओवादी केन्द्रलाई रहेको दावी गर्दै भने, “संविधानमा आदिवासी, जनजाति, मधेसी, महिला, र वञ्चित समुदायका लागि थप अधिकार सुनिश्चित गर्न संशोधन आवश्यक छ। माओवादीले संविधान सभामा राखेको भिन्न मतलाई अब कार्यान्वयन गरिन्छ।”

दाहालले सरकार ढाल्ने षड्यन्त्रमा भ्रष्टाचारका विषयले मुख्य भूमिका खेलेको आरोप लगाए। “बेचन झा गिरफ्तार भइसकेपछि सुई भ्रष्टाचारतर्फ सोझिँदै थियो, त्यसले ओलीलाई त्रसित बनायो। त्यसपछि सरकार गिराउने काम भएको हो,” उनले भने।

दाहालले नेपाली जनताका हकअधिकार र उपलब्धिलाई हर हालतमा जोगाउने प्रतिबद्धता दोहोर्‍याए। उनका अनुसार संविधान संशोधन र भ्रष्टाचारविरोधी अभियानमा माओवादी केन्द्रले आफ्नो जिम्मेवारी पूरा गर्नेछ।