काँग्रेस एमाले नेतृत्वमा देशले नयाँ गति लिने एमाले महासचिवको दाबि

नेकपा एमालेका महासचिव शंकर पोखरेलले कानुनी जटिलताको कारण विकास निर्माणले गति लिन नसकेको बताएका छन् ।

शुक्रबार प्रेस चौतारी नेपाल, चितवनले आयोजना गरेको पत्रकार सम्मेलनमा बोल्दै पोखरेलले कानुनी जटिलताको कारण काम अघि नबढेकाले त्यसलाई संशोधन गर्ने काम वर्तमान सरकारले सुरु गरेको बताए ।

सामान्य तरिकाबाट आजको निराशालाई चिर्न र देशको अर्थतन्त्र विकास गर्न नसकिने बताउँदै उनले यसको लागि फरक ढङ्गले काम गर्न आवश्यक रहेको बिचार राखे । आर्थिक हिसाबले राज्यको सामथ्र्य अति कमजोर भएको अवस्थामा वर्तमान सरकार बनेकोले त्यसको सुधारको काम सरकारले गरिरहेको पोखरेलले दाबि गरेका छन् ।

उद्योगी व्यवसायीमा देखिएको निराशा तथा युवा पलायनको अवस्थालाई रोकी मुलुकलाई पुनः आशावादी बनाउने र आर्थिक सङ्कटबाट बाहिर निकाली राजनीतिक स्थायित्व कायम गर्नुपर्छ भन्ने आधारमा अहिले एमाले र कांग्रेस मिलेर सरकार बनाएको उनले प्रष्ट पारे । एमाले र कांग्रेस एक अर्काका प्रतिस्पर्धी भएका बताउँदै पोखरेलले विशेष अवस्थामा मात्र दुई प्रतिस्पर्धी एक ठाउँमा उभिने बताए । दुई प्रतिस्पर्धी मिलेर संयन्त्र नै बनाई उद्देश्य प्राप्तिको काममा अघि बढिसकेको पनि उनले स्पष्ट पारे ।

नेपाली राजनीतिमा नेकपा माओवादी केन्द्रका अध्यक्ष एवं पुर्व प्रधानमन्त्री पुष्पकमल दाहाल प्रचण्डले अस्थिरताको बिउ रोप्ने काम गरेको आरोप लगाउँदै महासचिव पोखरेलले प्रचण्डकै कारण कांग्रेस र एमाले एक ठाउँमा उभिएको दाबि गरे ।