जिल्ला अस्पतालको सदस्यमा ४ जना मनोनित

सोलुखुम्बु । स्वास्थ्य मन्त्रालय कोशी प्रदेशले जिल्ला अस्पताल फाप्लु व्यवस्थापन समितिको रीक्त सदस्य पदमा ४ जनालाई मनोनयन गरेको छ ।

कोशी प्रदेश, जनस्वास्थ्य ऐन २०७७ को दफा ३१ को उपदफा १ मा सरकारी अस्पतालको सञ्चालन र व्यवस्थापन समितिको गठन हुने व्यवस्था अनुसार ४ जनालाई मनोनयन गरेको हो ।

मन्त्रीस्तरिय निर्णयअनुसार सोलुखुम्बु जिल्ला अस्पताल फाप्लुको व्यवस्थापन समिति सदस्यमा क्रमशः सुजता तामाङ, भानुभक्त उपाध्याय, मानबहादुर कटवाल र थीर बहादुर कार्कीलाई मनोनयन गरिएको मन्त्रालयले जनाएको छ । अस्पताल व्यवस्थापन समितिमा सम्बन्धित जिल्लाको समन्वय समिति प्रमुखको अध्यक्षता र अस्पताल प्रमुख सदस्य सचिव रहने गरी १३ जना कार्य समिति रहने व्यवस्था रहेको छ ।

अस्पताल व्यवस्थापन समिति सदस्यमा सम्बन्धित स्थानीय तहका प्रमुख, प्रमुख जिल्ला अधिकारी, जिल्ला प्रहरी प्रमुख, स्वास्थ्य कार्यालय प्रमुख, उद्योग वाणिज्य संघका अध्यक्ष, जिल्ला रेडक्रस सोसाइटी प्रमुख, स्थानीय समाजसेवी मध्येबाट मन्त्रालयले मनोनयन गरेका कम्तीमा दुई जना महिला सहित पाँच जना, स्वास्थ्य कार्यालय प्रमुख सदस्य सचिव रहने व्यवस्था रहेको छ ।

कोशी प्रदेश, जनस्वास्थ्य ऐन २०७७ अनुसार सो सदस्यहरूको पदावधि ३ वर्षको रहने व्यवस्था छ ।
अस्पतालको सञ्चालन र व्यवस्थापन गर्ने, अस्पतालको सञ्चालन र व्यवस्थापनका लागि आवश्यक साधन र स्रोत जुटाउने, अस्पतालको वार्षिक योजना तथा कार्यक्रम तयार पारी मन्त्रालय समक्ष पेस गर्ने, अस्पतालको भौतिक सम्पत्तिको संरक्षण गर्ने गराउने लगायतका काम कर्तव्य र अधिकार रहेको मन्त्रालयले जनाएको छ ।

मन्त्रालयले सदस्य मनोनीत गरेसँगै अस्पताल सञ्चालन र व्यवस्थापनमा थप टेवा पुग्ने जिल्ला अस्पताल फाप्लुका प्रमुख डा प्रशान्त शाहको भनाई छ ।