१० बर्ष अघि हराएको विमानको पुनः खोजी गर्न मलेसिया सरकार सहमत

मलेसियाली सरकारले १० वर्षअघि उड्डयनको सबैभन्दा ठूलो रहस्यमा बेपत्ता भएको यात्रुवाहक जेटको खोजी पुनः सुरु गर्न सैद्धान्तिक सहमति जनाएको छ ।

मलेसिया एयरलाइन्सको फ्लाइट एमएच ३७० मार्च २०१४ मा क्वालालम्पुरबाट बेइजिङका लागि २ सय ३९ यात्रु लिएर जाँदै गर्दा बेपत्ता भएको थियो ।

बोइङ ७७७ को दुर्घटनामा परेको बिमानको भग्नावशेष पत्ता लगाउने प्रयास वर्षौंदेखि रोकिएको थियो भने त्यसमा सवार यात्रुका सयौं परिवार त्रासदी पुर्ण र आशैआशामा जीवन जीउन बाध्य छन् ।शुक्रबार, मलेसियाका यातायात मन्त्री एन्थोनी लोकले मन्त्रिपरिषद्ले विमान फेला पार्न अमेरिकामा रहेको समुद्री अन्वेषण फर्म ओशन इन्फिनिटीसँग ७०मिलियन डलरको सम्झौतालाई सैद्धान्तिक रूपमा अनुमोदन गरेको बिबिसीले जनाएको छ ।

उडान एमएच ३७०, ८ मार्च २०१४ मा क्वालालम्पुरबाट उडान भरेको थियो । उडानको एक घण्टा भन्दा कम समयमा बिमानले एयर ट्राफिक कन्ट्रोलसँगको सम्पर्क गुमाएको थियो । उता राडारले पनि सो बिमानले आफ्नो योजना अनुसारको उडान मार्ग नपछ्याएको देखाएको थियो । दुर्घटनापछि तत्कालै खोज तथा अनुसन्धान शुरु भएता पनि हालसम्म सो बिमानको कुनै अवस्था पत्ता नलागेको बिबिसीले जनाएको छ ।

अनुसन्धानका क्रममा प्राप्त केही जानकारीबाट अन्वेषकहरुले विमान दक्षिणी हिन्द महासागरमा कतै दुर्घटनाग्रस्त भएको शंका गरेको छ । विमानका केही टुक्राहरू बेपत्ता भएकै वर्ष हिन्द महासागरको किनारमा फेला परेका थिए ।