सोलुखुम्बु जिल्लाबाट एकजना सुत्केरी महिलाको उद्धार गरिएको छ । आज सोलुखुम्बु जिल्लाको सोलुदुधकुण्ड वडा नं. ११ की २० बर्षिय सुस्मिता कार्की तथा उनको नवजात शिशुको उद्धार गरी थप उपचारका लागि काठमाण्डौ लगिएको छ ।
राष्ट्रपति महिला उत्थान कार्यक्रम अन्तर्गत उनिहरुको उद्धार गरी काठमाण्डौ कान्ति बाल अस्पताल पठाइएको जिल्ला अस्पताल फाप्लुले जनाएको छ ।
आज बिहान करिब ११ बजे सुस्मिता कार्कीले सामान्य प्रसूतिबाट छोरीलाई जन्म दिएकी थिईन् । सो नवजात शिशु महिना नपुगी जन्मिएको कारण श्वासप्रश्वासमा समस्या आउनका साथै तौलमा कमी रहेको जिल्ला अस्पताल फाप्लुकी वरिष्ठ अस्पताल नर्सिङ निरीक्षक एवं सूचना अधिकारी सानी शेर्पाले जानकारी दिईन् ।
नवजात शिशुको मुटुको चाल साधारणतया पर मिनेट १२० देखि १६० हुनुपर्ने तर शिशुको मुटुको चाल पर मिनेट ४० मात्र रहेकाले कृत्रिम श्वासप्रश्वास दिएर नवजात शिशुलाई बचाउन सफल भएको जिल्ला अस्पताल फाप्लुका विशेषज्ञ चिकित्सक डा. राम बाबु जोशीले बताए ।
उनलाई तत्कालै उद्धार गरी काठमाण्डौ पुर्याउन कोशी प्रदेशका प्रदेश सभा सदस्य एवं पुर्व मन्त्री बुद्धिकुमार राजभण्डारीले समेत समन्वय गर्नुभएको थियो । उनको उद्धारमा अस्पताल परिवार सहित नेपाल प्रहरीको टोली महत्वपुर्ण भुमिका निर्वाह गरेको उनको परिवार श्रोतले जनाएको छ ।
हाल आमाको अवस्था साधारण भएता पनि नवजात शिशुलाई भेन्टिलेटरमा राखि उपचार भईरहेको अस्पताल श्रोतले जनाएको छ ।
प्रतिक्रिया