बिपद् व्यवस्थापनमा स्थानिय तहको भुमिका महत्वपुर्णः प्रजिअ घिमिरे

बिपद् व्यवस्थापनका लागि स्थानिय तहको महत्वपुर्ण भुमिका हुने भन्दै सोलुखुम्बुका प्रमुख जिल्ला अधिकारी अनोजकुमार घिमिरेले यसका लागि सबैले हातेमालो गर्न आवश्यक रहेको औल्याएका छन् ।

मंगलबार जिल्ला प्रशासन कार्यालय, सोलुखुम्बुमा भएको सरोकारवाला निकायसँगको छलफल कार्यक्रममा प्रजिअ घिमिरेले विपद्का समयमा तत्काल राहत तथा उद्धारका लागि स्थानिय तहसँग समन्वय गर्दै आवश्यक सामाग्रिको व्यवस्थापनमा लाग्नु पर्ने औल्याएका हुन् । उनले जिल्लाका सबै सरोकारवाला निकायहरूसँग समन्वय गरी सम्भावित विपद् व्यवस्थापनका लागि काम गर्ने प्रतिबद्धता समेत जनाए ।

विपद् जोखिम न्यूनीकरण तथा व्यवस्थापन ऐन २०७४ को दफा १६ बमोजिम गठन भएको जिल्ला विपद् व्यवस्थापन समितिको बैठकले १२ वटा विभिन्न निर्णयहरू गरेको जिल्ला विपद् व्यवस्थापन समिति सोलुखुम्बुका संयोजक समेत रहेका प्रजिअ घिमिरेले जानकारी दिए ।

बैठकमा सहभागि राजनीतिक दलहरुले समेत आफ्नो धारणा राखेका थिए । नेकपा एमाले जिल्ला कमिटी, सोलुखुम्बुका सचिव कल्पना राईले एकद्वार प्रणाली मार्फत विपद् व्यवस्थापन कार्यमा हातेमालो गर्न दिईन । यस्तै नेकपा माओवादी केन्द्र सोलुखुम्बुका संयोजक नाम्गेल शेर्पाले बजार क्षेत्रको सडकमा चिसो मौषम बिहानै पानीले भिजाउँदा पानी बरफमा परिणत भई चिप्लने गरेको तथा यसले दुर्घटना निम्त्याउने भन्दै ध्यानाकर्षण गराए ।

बैठकमा उपस्थित सरोकारवालाहरूले आवश्यकताका आधारमा समन्वय, सहकार्य तथा सहजीकरण गर्ने बताउँदै बैठकले गरेका सबै निर्णयहरू कार्यान्वयनमा लगिने प्रतिबद्धता समेत जनाएका छन् ।

यस्तै जिल्ला स्थित विभिन्न सञ्चार माध्यमहरूलाई विपत् सम्बन्धी जनचेतनामूलक सन्देशहरू प्रसारण गर्न आग्रह गरिएको छ । बैठकमा विभिन्न राजनीतिक दल, सरकारी तथा गैर सरकारी कार्यालय, तीनै वटा सुरक्षा निकायका प्रमुख एवं प्रतिनिधि लगायतको उपस्थिति रहेको थियो ।