नेपाल–भारत सीमा सुरक्षासम्बन्धी उच्चस्तरीय बैठकमा सीमापार अपराध नियन्त्रण तथा तेस्रो मुलुकका नागरिकको अवैध प्रवेश निषेध गर्ने विषयमा छलफल भएको छ ।
शनिबारबाट शुरु भएको बैठकमा सीमा क्षेत्रमा हुने आपराधिक घटना नियन्त्रणका लागि दुवै तर्फबाट सुरक्षा व्यवस्था कडा पार्ने बिषयमा समेत छलफल भईरहेको बताईएको छ ।
बैठकमा सशस्त्र प्रहरी महानिरीक्षक राजु अर्यालद्धारा प्रस्तुत सीमा सुरक्षासम्बन्धी संयुक्त एजेण्डामा छलफल जारी रहेको छ । “सीमा क्षेत्रमा हुने अपराध नियन्त्रण, त्यसनिम्ति सूचना आदानप्रदान, राजस्व चुहावट नियन्त्रण, मानव बेचबिखन र तेस्रो मुलुकका नागरिकको अवैध प्रवेश नियन्त्रणलगायत विषय नेपालका तर्फबाट प्रस्ताव प्रस्तुत भएको छ ।
बैठकले यस पटक ठोस निष्कर्षका साथ निर्णय लिने महानिरिक्षक अर्यालले जानकारी दिएका छन् । बैठकमा महानिरीक्षक अर्यालसहित उच्च सुरक्षा अधिकारी, गृह मन्त्रालय, नेपाल प्रहरी, अनुसन्धान विभाग, नापी विभाग, परराष्ट्र मन्त्रालयका प्रतिनिधि र भारतको सीमा सुरक्षा बल (एसएसबी) का महानिर्देशक अमृतमोहन प्रसादको नेतृत्वमा ६ सदस्यीय टोली सहभागी छ ।
प्रतिक्रिया