कोशीमा अपाङ्गता रोकथाम तथा पुनःस्थापनाका लागि शिबिर संचालन हुने

अपाङ्गता रोकथाम तथा पुनःस्थापनाका लागि कोशी प्रदेशका ३० वटा पालिकामा प्रदेश सरकार, स्थानीय तह र करुणा फाउण्डेसन नेपालको त्रिपक्षीय सहकार्यमा अपाङ्गता शिबिर हुने भएको छ ।

मंशिर २ गतेबाट पुस दोस्रो हप्तासम्म संचालन हुने सो कार्यक्रममा अपाङ्गता भएका व्यक्तिहरूको स्वास्थ्य परीक्षण, पहिचान र परिचयपत्र वितरण गर्ने उद्देश्य रहेको छ ।

झापा, ताप्लेजुङ र तेह्रथुमका स्थानीय तहको प्रत्येक वडामा अपाङ्गता रोकथाम तथा पुनःस्थापनाका लागि शिविर आयोजना गर्ने तयारी भइरहेको करुणा फाउण्डेसन नेपाल कोशीका कार्यक्रम संयोजक कमल कोइरालाले जानकारी दिए ।

कार्यक्रममा नवजात शिशु, १० वर्षमुनिका बालबालिकाको परिचयपत्र वितरण, स्वास्थ्य परीक्षण, श्रवणयन्त्र, ह्वीलचियर, कृत्रिम हातखुट्टाको नापजाँच, विद्यालय भर्ना लगायत सेवा उपलब्ध हुने छ ।

कार्यक्रम संयोजक कोइरालाले तीनवटा संस्थाबीच कार्यक्रम सञ्चालनका लागि १२ करोडभन्दा बढीको लागत साझेदारी रहने बताए । हाल करुणा फाउण्डेसनले प्रदेश तथा स्थानिय सरकारको सहकार्यमा कोशीका बिभिन्न स्थानिय तहमा कार्यक्रम संचालन गर्दै आएको छ ।