गणेश हिमाल आधार शिबिरमा अलपत्र परेकाहरुको उद्धार

गणेश हिमाल आधार शिविर जाँदै गर्दा बिच बाटोमा नै अलपत्र परेकाहरुको हेलिकोप्टर मार्फत उद्धार गरी उपचारका लागि काठमाण्डौ ल्याईएको छ ।

आधार शिविरतर्फ जाँदै गर्दा बीच बाटोमै बिरामी परेर अलपत्र परेका ३ जनालाई २७ घण्टापछि उद्धार गरी उपचारका लागि काठमाण्डौ ल्याईएको हो । हिजो नै बिरामीहरुको उद्धार गर्ने प्रयास गरिएपनि खराब मौषमका कारण हेलिकोप्टर ल्याण्ड हुन सकेको थिएन ।

पर्यटन प्रवर्द्धनका लागि भन्दै गणेश हिमाल आधार शिविर जाँदै गर्दा डिभिजन वन कार्यालय धादिङका प्रमुख विष्णुप्रसाद आचार्य, प्राविधिक सहायक अनुसिया ढुंगानामा श्वासप्रश्वासको समस्या देखिएको थियो ।

आधार शिविर नपुग्दै आँखुखोला नजिक बिरामी परेपछि १६ जनाको टोली बीच बाटोमै रोकिएको थियो । बिरामी परेका सबैको अवस्था खतरामुक्त रहेको जिल्ला प्रहरी कार्यालय धादिङले जनाएको छ ।