कोप २९ मा नेपालका तर्फबाट उच्च्स्तरिय सत्र संचालन हुने

राष्ट्रपति रामचन्द्र पौडेलले आज कोप २९ मा उच्चस्तरिय सत्र संचालन गर्ने भएका छन् । जलवायु परिवर्तन सम्बन्धि संयुक्त राष्ट्रसंघिय सम्मेलनमा भाग लिन अजरबैजान पुगेका राष्ट्रपति पौडेलले आज नेपालका तर्फबाट उच्चस्तरिय सत्र संचालन गर्न लागेका हुन् ।

‘पर्वतीय क्षेत्रमा जलवायुजन्य नोक्सानीको सम्बोधन’ विषयमा हुने सत्रमा नेपालले आफ्ना ‘एजेण्डा’माथि विश्व समुदायको ध्यानाकर्षण गराउने बताईएको छ ।

हिजो मंगलबार राष्ट्रपपति पौडेलले कोप शिखर सम्मेलनलाई राष्ट्रका तर्फबाट सम्बोधन गर्दै हिमालको सुरक्षा भनेकै पृथ्वीको सुरक्षा हो भन्ने वास्तविकता मनन गर्न विश्व समुदायलाई आह्वान गरेका छन् । राष्ट्रपति पौडेलले भने, “हिमालको सुरक्षा भनेकै पृथ्वीको सुरक्षा हो भन्ने कुरा सबैले मनन गरौँ, पर्वतीय मुलुकका सेता हिमाल काला पहाडमा परिणत हुने क्रमले ती मुलुकमा मात्र होइन तल्लो तटीय मुलुकहरूलाई सङ्कटमा पुर्याउँछ भन्ने वास्तविकता विश्वले बिर्सन हुँदैन ।”

त्यस्तै मंगलबार नै माल्दिभ्सका राष्ट्रपति डा मोहम्मद मैज्जुसँग भएको भेटवार्तामा राष्ट्रपति पौडेलले जलवायु परिवर्तनको मारमा नेपाल र माल्दिभ्सजस्ता देश परेकाले जलवायु वार्ताहरूमा सहकार्य गर्नुपर्ने औल्याउनु भयो ।

यसपटक नेपाल ‘विश्व नेताहरू जलवायु कार्य शिखर सम्मेलन’मा राष्ट्रपति पौडेलको नेतृत्वमा सहभागी भएको छ ।

सम्मेलनमा ४० देशका राष्ट्रपति वा उपराष्ट्रपति तथा ३५ देशका प्रधानमन्त्रीसहित विश्वका अधिकांश मुलुकका जलवायु परिवर्तनका क्षेत्रमा कार्यरत प्रभावशाली नेताहरू छलफल र विश्वव्यापी सहकार्यका लागि सहभागी छन् ।