चिनिया खेलकुदको प्रतिनिधि मण्डलको सहयोग र सहकार्य सराहनीयः सदस्य सचिव घिसिङ

चिनिया खेलकुद प्रतिनिधिमण्डल तथा राष्ट्रिय खेलकुद परिषद् (राखेप) बिचको महत्वपुर्ण भेटघाट भएको छ । आज राखेपका सदस्य सचिव टंकलाल घिसिङको कार्यकक्ष, त्रिपुरेश्वरमा भएको भेट नेपालि खेलकुदको विकासका लागि महत्वपुर्ण भएको राखेप सचिवालयले जनाएको छ ।

चीनको युनान प्रदेश खेलकुद ब्युरोका निर्देशक याङ झोङ हुआसहितको प्रतिनिधिमण्डलसँग भएको भेटमा सदस्य सचिव घिसिङले चीन सरकारले नेपालको खेलकुद लगायत विभिन्न क्षेत्रमा गरेको सहयोग सराहनीय रहेको बताए । भेटमा सदस्य–सचिव घिसिङले भने, “चीन सरकारले खेलकुदसहित नेपालको विभिन्न क्षेत्रमा गर्दै आएको सहयोग प्रशंसनीय र सराहनीय छ । यसले नेपाल र चीनबीच रहँदै आएको सुमधुर सम्बन्धलाई अझ प्रगाढ बनाउनेमा विश्वस्त छु ।”

सदस्य–सचिव घिसिङले दुई देशबीच खेलकुदका क्षेत्रमा दिगो हिसाबले सहकार्य गर्नका लागि छलफल र गृह कार्य गरी अगाडि बढ्न तयार रहेको जानाउँदै राखेपलाई खेल सामाग्री र खेलकुद विज्ञान ‘रिसर्च ल्याब’ का लागि सामग्री सहयोग गरेकोमा धन्यवाद दिनुभयो ।

यसअघि चीनको खेलकुद ब्युरोले राष्ट्रिय खेलकुद परिषद् (राखेप) लाई ७२ लाख रुपैयाँ बराबरको सामाग्री सहयोग स्वरुप प्रदान गरेको छ । युनान प्रदेश खेलकुद ब्युरोका निर्देशक हुआले राखेपकी निमित्त सदस्य–सचिव अञ्जना श्रेष्ठलाई पोखरामा आयोजित एक कार्यक्रमबीच उक्त सामाग्री हस्तान्तरण गर्नु भयो । स्पोर्ट्स साइन्स रिसर्च ल्याबका लागि सामाग्री र खेल सामाग्री प्रदान गरिएको हो ।

भेटमा निर्देशक याङले नेपालसँग खेलकुद, पर्यटन र सांस्कृतिक क्षेत्रमा विशेषगरी युवा लक्षित कार्यक्रममा सहकार्य गर्न चाहेको बताउँदै युनान भ्रमणका लागि निमन्त्रणा गरिन ।