स्वास्थ्य चौकी भवनका लागि पाहिला पाहिलाको आशा फ्रान्सले ५० लाख दिने

सोलुखुम्बु जिल्लाको सोलुदुधकुण्ड नगरपालिका वडा नं. ११ तिङ्लामा स्वास्थ्य चौकीको सुविधासम्पन्न भवन निर्माण गर्नका लागि सोलुदुधकुण्ड नगरपालिका र पाहिला पाहिलाको आशा फ्रान्स (PPKAF) बीच समझदारी पत्रमा हस्ताक्षर कार्यक्रम सम्पन्न भएको छ ।

करिब साँढे २ करोडको लागतमा निर्माण सम्पन्न हुने भवनका लागि (PPKAF) ले रु ५० लाख रुपैंया आर्थिक सहयता उपलब्ध गराउने छ । हस्ताक्षर कार्यक्रममा PPKAF का अध्यक्ष पासाङ काजी शेर्पाले सोलुदुधकुण्ड नगरपालिकासँगको सहकार्यमा स्वास्थ्य चौकी निर्माण कार्यमा सहभागी हुन पाएकोमा खुशी व्यक्त गरे । आगामी दिनमा यस योजनालाई थप रकम समेत उपलब्ध गराउन पहल गर्ने उनले बताए ।

पाहिला पाहिलाको आशा फ्रान्सले गरेको यस पुण्य कार्य प्रति धन्यवाद व्यक्त गर्दै नगर प्रमुख नाम्गेल जाङ्बु शेर्पाले आगामी दिनमा समेत सहकार्य हुने विश्वास ब्यक्त गरे ।

पाहिला पाहिलाको आशा फ्रान्सका तर्फबाट तिङ्लामा नै थेरापी सेण्टर निर्माणाधीन अवस्थामा रहेको, कोभिड–१९ को समयमा स्वास्थ्य सामाग्रि सहयोग तथा विपद प्रभावित खुम्बुका थामेबासीहरुलाई पुर्याउनु भएको सहयोग प्रति नगर प्रमुख शेर्पाले आभार समेत प्रकट गरेका छन् ।

कार्यक्रममा नगर उपप्रमुख गान्धी माया तामाङ, प्रवक्ता फूर्वा ग्याल्जेन शेर्पा, वडा नं. ११ का वडाध्यक्ष टंक बहादुर कार्की र वडा सदस्यहरु, वडा नं. ७ र १० का वडाध्यक्ष सोनाम ग्याल्जेन शेर्पा र होम बहादुर मगर, कार्यपालिका सदस्य निरकुमार नेपाली तथा निमित्त प्रमुख प्रशासकीय अधिकृत रामकुमार खड्काको समेत उपस्थिति रहेको थियो ।