लेबनानमा ईजरायली आक्रमण तिव्र बनेपछि शान्ति मिसनमा खटिएका ८ सय ५० नेपाली शान्ति सेना तथा अन्य बंकरमा सरेका छन् ।
ईजरायलले लेबनानका लागि संयुक्त राष्ट्र संघबाट खटिएका शान्ति मिसनका सम्पुर्ण शान्ति सैनिक फिर्ता गर्न भनेपनि राष्ट्र संघले शान्ति सैनिक फिर्ता नबोलाउने अडान लिएपछि ईजरायलले दक्षिणी लेबनानमा कारबाही तिव्र बनाएको हो ।
संयुक्त राष्ट्र संघले ‘सेक्युरिटी लेभल ३’ लागू गराएपछि यूएन प्रोटोकल अनुसार नेपाली शान्ति सैनिक बंकरमा सरेको नेपाली सेनाले जनाएको छ ।
जंगीअड्डाका अनुसार, लेबनानमा ८७७ नेपाली सैनिक रहेपनि २७ जना हेडक्वार्टरमा विभिन्न तहमा कार्यरत छन् ।
इजरायली डिफेन्स फोर्स (आईडीएफ) ले लेबनानको इस्लामिक विद्रोही संगठन हिजबुल्लाहलाई समाप्त पार्न भन्दै १५ असोजबाट स्थल कारबाही समेत थालेको छ ।
इजलायलका प्रधानमन्त्री बेन्जमिन नेतन्याहूले आइतबार संयुक्त राष्ट्रसंघीय मिसनलाई दक्षिण लेबनानबाट हटाउन समेत चेतावनी दिए । तर राष्ट्रसंघले शान्ति स्थापनाका खटिएको सैनिक फिर्ता नहुने जवाफ दिएको छ ।
यसले तनाव बढेको छ । शुक्रबार हवाई आक्रमणका क्रममा श्रीलंकाका दुई जना शान्ति सैनिक घाइते भएका छन् । नेपाली सैनिक अधिकृतहरुले भने शान्ति सेनालाई लक्षित गरेर कारबाही नगरिएपनि आसपासमा फायरिङ हुँदा त्यसको केही प्रभाव शान्ति सैनिक खटिएको इलाकामा पनि परेको विश्लेषण गरेका छन् ।
नेपाली सेनाका प्रवक्ता गौरवकुमार केसीले नेपाली सैनिक बंकरमा बसेको पुष्टि गरेका छन् । तर त्यो लामो समयसम्म नजाने केसीले बताएका छन् ।
अधिकारीहरुका अनुसार, सेनाले बंकरमा निश्चित समयका लागि रासन, पानी लगायतको व्यवस्थापन सधैँ गरिरहेको हुन्छ । तर, लामो समयसम्म पूर्णतः मुभमेन्ट बन्द हुँदा कठिनाइ देखा पर्छ ।
त्यसैले परिस्थिति केही सहज हुने वित्तिकै सुरक्षा लेभल परिर्वतन हुने सैनिक प्रवक्ता केसीले बताए ।
प्रतिक्रिया