फुलपातिबाट नेपाली रंगमञ्चमा भिडन्त

अहिले नेपाली सिनेमा क्षेत्रमा फुलपातिका दिन अर्थात बिहिबारबाट प्रदर्शनको तयारीमा रहेका तीन चलचित्रको चर्चा चुलिएको छ ।

एकसाथ प्रदर्शनमा आउने चलचित्रहरु छक्का पञ्जा ५, १२ गाउँ र ज्वाई साबको भिडन्तलाई लिएर नेपाली रंगमञ्च अहिले तातिएको छ । यो त्रिपक्षीय भिडन्तलाई यस वर्षकै सबैभन्दा ठूलो मानिएको छ । तीनवटै फिल्मको ‘स्टारकास्ट’ र चर्चा हेर्दा यसपटक बक्स अफिसमा टक्करको प्रतिस्पर्धा हुने देखिन्छ ।

गत सोमबारबाट यी तीन फिल्मको मल्टीप्लेक्सहरुमा अग्रिम बुकिङ खुला भैसकेको छ । जसअनुसार यसअघि सुपरडुपर हिट बन्दै आएको स्विकेल मुभि छक्कापञ्जाले अन्य २ चलचित्रभन्दा बढी सोज पाएको छ । यस चलचित्रले क्यूएफएक्समा मात्र फिल्मले कूल ९० सोज पाएको छ । अझ बुधबार साँझसम्म क्यूएफएक्समै फिल्मले एक सय सोज नघाउने सम्भावना प्रवल छ ।

यस्तै, काठमाडौंका आईएनआई, वान् सिनेमाज्, बिग मुभिज, बिएसआर मुभिज्, एफक्यूब, रञ्जना सिनेप्लेक्ससहित उपत्यकाबाहिरका मल्टीप्लेक्सहरुले पनि फिल्मलाई उच्च सोज बाँडेका छन् ।

सरसर्ती हेर्दा फिल्मले पहिलो दिन देशभर ३ सय हाराहारी सोज पाउन सक्ने देखिन्छ । यो संख्या आक्रामक ओपनिङका लागि पर्याप्त छ ।

यता ‘१२ गाउँ’ ले क्यूएफएक्स चेनमा कूल ५३ सोज पाएको छ । देशका अन्य मल्टीप्लेक्स सहितको सोज जोड्ने हो भने डेढ सय पुग्छ । यो सोज संख्यालाई राम्रो मान्न सकिन्छ ।

त्यस्तै, ‘ज्वाइँ साब’ सोज संख्यामा तेस्रो स्थानमा छ । फिल्मले पहिलो दिन देशभर एक सय हाराहारी सोज पाउने देखिएको छ । क्यूएफएक्स चेनमा फिल्मलाई कूल ४० सोज प्राप्त छ । फूलपातीका तीन नेपाली फिल्मले गर्दा अघिल्लो हप्ता आएको हलिउडको ठूलो फिल्म ‘जोकर २’लाई बिहीबारबाटै उतारिँदैछ । त्यसो त नेपालमा यो फिल्मको व्यापार नाजुक छ ।

गत हप्ताको बिहीबार (घटस्थापना)बाट प्रदर्शनमा आएको ‘बेहुली फ्रम मेघौली’ले भने फूलपातीको दिन देशभर ५० हाराहारी सोज ‘होल्ड’ गर्ने देखिन्छ । फूलपातीको भोलिपल्ट (शुक्रबार) बलिउड अभिनेत्री आलिया भट्ट स्टारर फिल्म ‘जिग्रा’ रिलिज हुन लागेकाले यसलाई पनि मल्टीप्लेक्सहरुले राम्रो सोज उपलब्ध गराएका छन् । यसपालिको दशैंमा दर्शकलाई आफ्नो रोजाई अनुसारको फिल्म हेर्न पाउने अवसर छ । अब व्यापारमा कुन फिल्मले बाजी मार्छन्, त्यो हेर्न बाँकी छ ।