अमेरिकामा टिकटकलाई मुद्धैमुद्धा

अमेरिकाका एक दर्जन राज्यले टिकटक बिरुद्ध बिरुद्ध मुद्धा दायर गरेका छन् । सामाजिक सञ्जाल प्ल्याटफर्म टिकटकले किशोरकिशोरीहरूमा मानसिक स्वास्थ्य संकट निम्त्याउन मद्दत गरेको आरोप लगाउँदै अमेरिकाका एक दर्जनभन्दा बढी राज्यले टिकटकविरुद्ध मुद्दा दायर गरेका हुन् ।

अमेरिकास्थित बिभिन्न राज्यका १४ महान्यायाधिवक्ताहरूको समूहले टिकटकले बच्चाहरूलाई एम प्रयोगमा लत बसाउन प्रेरित गर्दै मानसिक रुपमा संकट निम्तने गरी जनतालाई जानाजानी भ्रमित गरेको आरोप लगाएको बिबिसीले जनाएको छ ।

यसअघि नै टिकटक प्लेटफर्मले गत अप्रिलमा कंग्रेसले पारित गरेको कानुनसँग मुकाबिला गरिरहेको छ जुन कानुनले टिकटकलाई अमेरिकाबाट प्रतिबन्ध लगाउने छ ।

न्यूयोर्कका महान्यायाधिवक्ता लेटिया जेम्सले देशभरका युवाहरू टिकटकमा आउने चुनौतीको सामना गर्ने क्रममा मरेका वा घाइते भएका थिए भने अन्य धेरैले टिकटकको लतका कारण दुःखी, चिन्तित र निराश महसुस गर्न थालेको बताएका छन् ।

तर उता टिकटकले भने आफ्नो सामाजिक प्लेटफर्म युवाहरूका लागि सुरक्षित रहेको दावि गरेको छ । यसलाई नकारात्मक ढंगबाट मात्र ब्याख्या गरिएको भन्दै टिकटकले प्रयोगकर्ताको छनौटलाई ध्यानमा राखेर यसले कार्य गर्ने जनाएको छ ।