खुम्बु जाने सडक छेउबाससम्म खुल्यो

खुम्बुपासाङल्हामु गाउँपालिका जोड्ने एक मात्र सडक सञ्जालको छेउवाससम्मको बाटो पुनः सुचारु भएको छ । बर्षा पछि पहिरोका कारण अबरुद्ध सडक एक महिनाको प्रयासपछि पुनः संचालनमा आएको हो ।

स्वर्गिय ङिम दोर्जि शेर्पा पर्यटन सडक अन्तर्गत मानेडाँडा देखि थाम डाँडा हुँदै छेउबाससम्मको सडक खुले पश्चात पर्यटक तथा सवारी चालकहरुलाई केही राहत मिलेको खुम्बुपासाङल्हामू गाउँपालिकाको फेसवुक पेज मार्फत जानकारी दिईएको छ ।

पहिरो पन्छाउने कार्य सकिए पछि यसअघि काँडेसम्म मात्र संचालनमा रहेको सडक आईतबारबाट छेउबाससम्म सुचारु भएको गाउँपालिका प्रवक्ता ल्हाक्पाछिरी शेर्पाले जानकारी दिए ।

साथै, छेउबास भिरमा सडक ट्रयाक ओपनको कार्यका लागि ब्लास्टिङको काम समेत निरन्तर जारी रहेकाले छेउबास देखी पाखेपानि सम्म वैकल्पिक बाटोको प्रयोग गर्न पनि पालिकाले आग्रह गरेको छ ।

कच्ची सडक खुले पनि त्रास भने कायमै रहेको यात्रु तथा सवारी चालकहरु बताउँछन् । सडक टयाक ओपनको कार्य पनि चलिरहेको तथा बर्षातले धेरै स्थानमा पहिरो गएकाले बाटोमा के भने थाहा नभएको उनिहरुको भनाई छ ।

 

फोटोः खुम्बुपासाङल्हामू गाउँपालिकाको फेसवुक पेज