काँग्रेस-एमालेको प्रदेश सरकारलाई ध्यानाकर्षण

बाढी पहिरो प्रभावितलाई राहत उपलब्ध गराउन नेपाली काँग्रेस तथा नेकपा एमालेले कोशी प्रदेश सरकारको ध्यानाकर्षण गराएको छ ।

बाढी पहिरो प्रभावितलाई तत्काल राहत उपलब्ध गराउन माग गर्दै कांग्रेस–एमालेले कोशी प्रदेश सरकारलाई पालैपालो ज्ञापन पत्र बुझाउँदै ध्यानाकर्षण गराएको हो ।

काँग्रेसले आईतबार तथा एमालेले शनिबार मुख्यमन्त्री हिक्मतकुमार कार्कीलाई ज्ञापन पत्र बुझाएको हो ।
कांग्रेस र एमालेले मृतकका परिवारलाई राहत, प्रभावितलाई क्षतिपूर्ति र बाढी पहिरोका कारण अवरुद्ध सडक खुलाउन माग गर्दै सरकारलाई पालैपालो ज्ञापनपत्र बुझाएका हुन् ।

कांग्रेस प्रदेश सभापति तथा संसदीय दलका नेता उद्धव थापाले मृतकलाई राहत, प्रभावितलाई तत्काल क्षतिपूर्ति र अवरुद्ध यातायात खुलाउन माग गर्दै मुख्यमन्त्रीलाई ज्ञापनपत्र बुझाए । यता नेकपा एमालेका तर्फबाट प्रदेश इञ्चार्ज तथा पूर्व मुख्यमन्त्री शेरधन राई तथा नेकपा एमाले प्रदेश अध्यक्ष घनश्याम खतिवडाले पनि तत्काल राहत र क्षतिपूर्ति उपलब्ध गराउन माग गर्दै ज्ञापन पत्र बुझाएका थिए ।

प्रदेश सरकारले गत आइतबार नै प्राकृतिक प्रकोपमा ज्यान गुमाएकाहरुको परिवारलाई तत्काल जनही एक लाख रुपैयाँका दरले राहत उपलब्ध गराउने निर्णय गरेको थियो ।

ज्ञानपन पत्र बुझाउन आएका पार्टीका नेताहरुलाई मुख्यमन्त्री कार्कीले राहत वितरण गर्ने निर्णय भइसकेको र अवरुद्ध सडक खोल्ने प्रयास भइरहेको बताए । बाढीले अवरुद्ध भएका सडक खोल्ने र पुललगायतको मर्मत सम्भार र निर्माणलाई द्रुत गतिमा अघि बढाउने उनले बताए ।