अभिनन्दनले रसिए रसिकका आँखा

साहित्यकार गणेश रसिकले भव्य नागरिक अभिनन्दन प्राप्त गर्नुभएको छ । पूर्वराष्ट्रपति विद्यादेवी भण्डारीले गायक रसिकलाई अभिनन्दनका साथमा ‘गणेश रसिक : अभ्यार्थना ग्रन्थ’ कृति सार्वजनिक गर्नुभयो ।

कार्यक्रमलाई सम्बोधन गर्दै पूर्वराष्ट्रपति भण्डारीले राष्ट्र, राष्ट्रियता र आमनागरिकका पक्षमा सिर्जित रसिकका सिर्जना रैथाने स्वादका र कालजयी रहेको चर्चा गर्नुभयो । उहाँले देश र समाजलाई रसिकले दिनुभएको योगदानका विषयमा लेखिएका लेख सङ्ग्रह गरी ग्रन्थ प्रकाशन गर्नु खुसीको विषय भएको र यसले उहाँका जीवनका आरोह अवरोधका साथै समाज र राष्ट्रलाई दिनुभएको योगदान बुझ्न सहयोग पुग्ने बताउनुभयो ।

अभिनन्दन पश्चात आफ्नो भनाई राख्ने क्रममा साहित्यकार गणेश रसिकले यो सम्मान तथा अभिन्दनका लागि आफू लायक छु या छैन थाहा नभएको तर यसरी अभिनन्दन गर्दा सबैप्रति आभारी रहेको प्रतिक्रिया दिनुभयो । आफु बिरामी परेर ओछ्यान परेको तथा उपचार चलिरहेको सुनाउँदै उहाँले साहित्यिक श्रृजनामा लाग्दै गर्दा आफुले यो सम्मानको कल्पना कहिल्यै पनि नगरेको बताउनुभयो । रसिएका नयनहरुलाई यताउता डुलाउँदै रसिकले आफ्नो रचनाले समाजमा थोरै भए पनि परिवर्तन ल्याएछ भने त्यो आफ्नो जीवनको महत्वपुर्ण र सफल क्षण हुने जिकिर गर्नुभयो ।

भोजपुर जिल्लासँग सम्बन्धित ३० वटाभन्दा बढी संघसंस्थाले गायक रसिकलाई नागरिक अभिनन्दन प्रदान गर्न समन्वयात्मक भुमिका निर्वाह गरेको हो । भोजपुरे सेवा समाज काठमाडौँको आयोजना तथा एम्बिसन एकाडेमी काठमाडौँको सहआयोजनामा भएको उक्त कार्यक्रममा भोजपुरे सेवा समाजका अध्यक्ष पासाङ दोर्ची शेर्पाले साहित्यकार रसिकले समाज र राष्ट्रलाई सङ्गीत दिएर, कृति लेखेर महत्वपूर्ण योगदान दिनुभएको चर्चा गर्नुभयो ।

साहित्यकार शङ्कर कोइराला र सङ्गीतकार बुलु मुकारुङले साहित्यिक तथा साङ्गीतिक क्षेत्रमा रसिकले पु¥याउनुभएको योगदानका बारेमा चर्चा गर्नुभएको थियो । उक्त ग्रन्थको सम्पादन साहित्यकार सुदर्शन श्रेष्ठ र शशि लुमुम्बुले गर्नुभएको हो ।