वडामा रात्रीकालिन होटल संचालन गर्न नपाईने

सोलुखुम्बु जिल्लाको थुलुङ दुधकोशी गाउँपालिका वडा नम्बर ७ र ८ मा राती ९ बजे देखि होटलपसल सञ्चालन गर्न नपाइने भएको छ । दुबै वडाको बुधबार सम्पन्न संयुक्त बैठकले उक्त निर्णय गरेको हो ।

राती अबेर सम्म होटल सञ्चालन गर्दा मदिरापान सेवन गर्ने र गाउँघरमा होहल्ला गरि शान्ति सुव्यवस्थामा समेत असर पार्ने कार्य बढेको गुनासो बढेपछि होटल सञ्चालन सम्बन्धि समय निर्धारण गरिएको वडा नम्बर ७ का वडा अध्यक्ष भोजराज कार्कीले जानकारी दिए । प्रचलित कानुन विपरितका कार्यहरु दिनप्रतिदिन बढ्दै गएको भन्ने जनगुनासो सम्बन्धि सबैपक्षलाई सचेत गराउने र त्यसको अनुगमन तथा उक्त कार्य न्यूनीकरणका लागि स्वयम्सेवी युवा तस्ता गठन गरि संयुक्त रुपमा परिचालन गर्ने समेत निर्णय गरिएको हो ।

यस्तै अनाआवश्यक रुपमा होहल्ला गर्ने, बाइकमा चर्को ध्वनी निकाली नियम विपरित सवारी सञ्चालन गर्नेहरुको निगरानी गरि कानुन अनुसार कार्वाहीका लागि सहयोग गर्ने पनि निर्णय गरिएको वडा नम्बर ८ का वडा अध्यक्ष राजेश किराँतीले जानकारी दिए । उनका अनुसार वडावासीको गुनासो तथा मागलाई मध्यनजर गरी गरिएको निर्णयलाई कार्यान्वयन गर्न वडाले नेपाल प्रहरी तथा वडामा गठित स्वयंसेवी युवादस्तालाई परिचालन गर्न वडाले समन्वयन गर्ने समेत निर्णय भएको छ ।

यस्तै यस वर्षको तिहारमा राति १० बजे भन्दा बढी देउसी भैलो खेल्न नपाइने समेत उक्त बैठकले निर्णय गरेको छ । सोही बैठकले दुवै वडामा पर्ने सडक खण्डलाई व्यवस्थित बनाउनको लागि १० दिन भित्र मर्मत तथा सरसफाईको कार्य गर्नको लागि महाकुलुङ र एपेक्स हाइड्रोपावर कम्पनीलाई अनुरोध गर्ने निर्णय गरेको छ ।